Grunnskólinn á Stöðvarfirði

Íslenska

Kennari

Sólrún Friðriksdóttir

Í 8.-10. bekk er leitast við að vinna með alla þætti móðurmálsins þannig að hver þáttur styðji annan og þeir myndi saman eina heild. Mismunandi þættir móðurmálsins eru kenndir í tengslum hver við annan eftir því sem aðstæður og námsefni gefa tækifæri til. Á þessu stigi eru gerðar auknar kröfur um skilning nemenda á grunnhugtökum málfræði og bókmennta, án þess þó að hugtakanámið sé markmið í sjálfu sér. Mikilvægt er að nemendur fái að njóta tungumálsins í öllum sínum myndum, hlýði á upplestur og söng, sjái leiksýningar og kvikmyndir og taki þátt í að flytja menningartengt efni. Markvisst er unnið að ritun og stafsetningu og tölvutæknin nýtt til þjálfunar og bæði til upplýsingaöflunar og miðlunar. Lögð er áhersla á innihaldsrík viðfangsefni sem tengjast hvers konar textum, málnotkun fjölmiðla og málefnum líðandi stundar.

Við lok 10. bekkjar:

Lestur

• hafi nemandi náð góðum tökum á lestri, geti lesið þó nokkuð hratt og með góðum lesskilningi alla almenna texta
• geti nemandi einnig lesið flókna nytjatexta og áttað sig á innihaldi þeirra, greint aðalatriði frá aukaatriðum og áttað sig á mismunandi markmiðum höfunda með texta

Talað mál og hlustun

• hafi nemandi náð góðum tökum á framburði og framsögn
• geti nemandi áttað sig á skýrum og óskýrum framburði og geti flutt bókmenntatexta þannig að það sé í samræmi við inntak hans
• geri nemandi sér grein fyrir algengum hugtökum sem varða framsögn
• geti flutt mál sitt, kynnt tiltekin viðfangsefni og kunni að hlusta á aðra.

Hlustun og áhorf:

• geti nemandi notið menningarlegs efnis í hljóð- og myndformi, m.a. kynnst íslenskum kvikmyndum og þekkt dæmi um tengsl þeirra við bókmenntir

Ritun:

• geti nemandi látið frá sér fara ritað mál af ýmsu tagi, hafi fengist við skapandi skrif og áttað sig á ólíku stílgildi orða og setningargerðum, orðtökum og málsháttum
• geti nemandi nýtt sér málfræðihugtök við umfjöllun um frágang, málsnið og stíl og hafi öðlast öryggi í frágangi handskrifaðs texta svo og í tölvutæku formi
• geti nemandi skrifað skýrt og greinilega og mótað sína persónulegu rithönd
• vera fær um að tjá hugmyndir sínar og skoðanir og færa rök fyrir þeim
• geti nemandi skipt texta í málsgreinar, efnisgreinar og kafla með fyrirsögnum og geti metið færni sína í stafsetningu og nýtt sér viðeigandi hjálpargögn, t.d. handbækur og orðabækur

Bókmenntir:

• hafi nemandi lesið og rætt um íslenska bókmenntatexta bæði forna og nýja og einnig ýmsa aðra mismunandi texta íslenska og þýdda. Einnig hafi hann lesið og fjallað um ýmsar tegundir ljóða. Lesin hafi verið bókmenntaverk að eigin vali og skrifuð umfjöllun um þau
• kunni mismunandi lestraraðferðir og geti greint aðal-og aukaatriði í texta. geti nemandi lesið almenna texta af öryggi og með góðum skilningi
• hafi nemandi lesið og fjallað um valin ljóð og þekki til bragfræði og helstu einkenni kveðskapar
• geti nemandi aflað sér heimilda, t.d. á bókasafni, í dagblöðum, tímaritum og á Netinu

Málfræði:

• geri nemandi sér grein fyrir grundvallarhugmyndum íslenska málkerfisins
• hafi nemandi náð nokkurri leikni í að nota málfræðileg hugtök í umræðu um mál og gert sér grein fyrir mismunandi málfari og málsniði
• þekki nemandi helstu framburðarmállýskur á Íslandi
• hafi nemandi ræktað með sér áhuga á móðurmálinu og áttað sig á skyldleika íslensku við önnur mál

Sjá aðalnámskrá grunnskóla fyrir íslensku

Kennsluaðferðir:

• útlistunarkennsla; kennari miðlar þekkingu, útskýrir, varpar fram spurningum, ræðir málin og dregur ályktanir
• hópaverkefni
• einstaklingskennsla
• einstaklingsvinna

Námsefni vetrarins

Kennslubók í málvísi og ljóðlist, Finnur 1, Fallorð, Sagnorð, Smáorð, Smásagnasmáræði,Gísli Súrsson, Ljóðspor / Ljóðspeglar, Skólavefurinn og Nams.is.

Námsmat:

Áhugi og virkni í tímum, skil á heimaverkefnum, skyndipróf, miðsvetrar-og vorpróf. Sjálfsmat.

Stærðfræði

Jónas E. Ólafsson

Markmið

Sjá aðalnámskrá grunnskóla fyrir stærðfræði

Þegar nálgast lok skyldunáms verður krafan um góða þekkingu og skilning á helstu þáttum stærðfræðinnar áþreifanlegri en á yngri stigum. Þá er ætlast til þess að nemendur þekki vel til helstu hugtaka og aðferða, reiknings, algebru, rúmfræði, tölfræði og líkindafræði. Einnig ættu þeir að hafa öðlast sjálfstraust til að leita lausna ýmissa viðfangsefna og færni til að tjá sig munnlega og skriflega um niðurstöður. Drjúgur hópur nemenda ætti að hafa náð valdi á undirstöðuatriðum algebru. Mikilvægt er að nemendur nái góðum tökum á að leysa jöfnur og átta sig á röksamhengi í því ferli. Gert er ráð fyrir að nemendur hafi gott vald á metrakerfinu og mælingum, geti reiknað ummál og flatarmál algengra flatarmynda og rúmmál og yfirborð einfaldra þrívíðra hluta. Tengsl stærðfræðinnar við daglegt líf er mikilvægt og því þarf að tengja stærðfræðinámið verkefnum sem nemendur þekkja til. Markmiðið með þessu er að nemandinn öðlist sjálfstraust til að beita stærðfræðinni af öryggi í daglegu lífi og geri sér grein fyrir að góð stærðfræðikunnátta er mikilvægur þáttur í almennri lífsleikni.

Námsefni

Almenn stærðfræði I, II og III. Átta-tíu bækurnar (að hluta), önnur verkefni frá kennara, rasmus.is og fleiri vefverkefni.

Námsmat

Fylgst er reglulega með kunnáttu nemenda með könnunarverkefnum og heimaverkefnum. Miðsvetrarpróf og vorpróf
 

Enska

Kennari

Björgvin Valur Guðmundsson

Á upplýsingaöld er kunnátta í ensku orðin nauðsynleg í daglegu lífi. Við þurfum að geta átt samskipti við fólk erlendis, nýtt okkur upplýsingar á tölvutæku formi og notað tungumálið til gagns og ánægju. Þess vegna leggjum við mikla áherslu á talað mál alveg frá 5. bekk.

Námsefni

Spotlight, Network 2, Network 3 Write Wright  og efni af netinu.

Við lok 10. bekkjar:

Talað mál:

• geti nemandi tjáð sig skýrt og áheyrilega á réttan og viðeigandi hátt um það sem snertir hann persónulega
• geti nemandi bjargað sér á ensku við óvæntar og ólíkar aðstæður
• geti nemandi tekið orðið, umorðað, leiðrétt sig, tjáð skoðanir sínar og tilfinningar og brugðist við samsvarandi upplýsingum frá öðrum
• geti nemandi komist að sameiginlegri niðurstöðu með öðrum, látið í ljós aðdáun eða vanþóknun, verið sammála eða ósammála
• geti nemandi veitt upplýsingar um íslenska menningu og umhverfi
• þekki nemandi mismunandi framburð, áherslur, ítónun og hrynjandi

Hlustun:

• skilji nemandi þegar nokkrir tala saman
• skilji nemandi ensku af helstu málsvæðum enskrar tungu, talaða á eðlilegum hraða
• skilji nemandi leiðbeiningar og fyrirmæli
• kunni nemandi nokkur skil á félagslegu hlutverki málsins
• geti nemandi hlustað á mismunandi hátt eftir upplýsingum
• skilji nemandi meginþráð í fréttaefni

Lestur:

• geti nemandi lesið í mismunandi tilgangi
• geti nemandi lesið aðgengilegt fræðsluefni
• geti nemandi nýtt sér uppsláttarrit
• geti nemandi lesið almenna rauntexta, bókmenntir, skáldsögur, ljóð og smásögur ætlaðar enskumælandi fólki
• hafi nemandi kynnst menningu enskumælandi þjóða

Ritun:

• geti nemandi tjáð sig um óskir sínar, þarfir, tilfinningar og skoðanir
• geti nemandi skrifað texta í mismunandi tilgangi
• geti nemandi unnið markvisst með orðaforða
• kunni nemandi að beita algengustu reglum um málfræði og málnotkun
• hafi nemandi kynnst ferlisritun og hlotið grunnþjálfun í henni

Sjá aðalnámskrá grunnskóla fyrir erlend tungumál

Danska

Kennari:

Sólrún Friðriksdóttir

Danska er annað erlenda málið sem nemendur læra í grunnskóla. Með námi í dönsku er stuðlað að því að viðhalda og efla tengsl við Norðurlönd. Danska er kennd vegna samskipta og menningartengsla norrænna þjóða og einnig sækir stór hópur Íslendinga nám og störf á Norðurlöndum. Danska og íslenska eru náskyld tungumál og auðveldar það Íslendingum dönskunámið. Segja má að dönskukunnátta sé lykill að Norðurlöndum og nýtist því einnig til að eiga samskipti við þá sem tala norsku og sænsku.

Námsmarkmið:

Nemendur þurfa að fá tækifæri til að hlusta á dönsku eins oft og kostur er. Nauðsynlegt er að nemendur fái æfingu í að tala málið með notkun talæfinga. Megintilgangur lestrar er að auka við orðaforða og áhersla lögð á fjölbreytta lestrartexta. Ritun er ætlað að festa þann orðaforða sem tengist viðfangsefnum.

Við lok 10. bekkjar:

Hlustun:

• geti nemandi skilið leiðbeiningar og fyrirmæli um athafnir daglegs lífs, aðalatriði í töluðu máli og geta fylgst með samfelldri frásögn eða tali kennara

Lestur:

• geti nemandi giskað á merkingu einstakra orða út frá samhengi, geti beitt leitarlestri þ.e. leitað að ákveðnum upplýsingum í texta, og lesið sér til gagns og ánægju

Talað mál:

• geti nemandi bjargað sér í daglegu lífi í Danmörku (og á Norðurlöndum) þ.e. verslað, beðið um aðstoð eða upplýsingar, geti sagt frá sjálfum sér og persónulegum högum sínum í samtölum og samfelldu máli og sýnt kurteisi í samskiptum þ.e. borið fram afsökunarbeiðni, sýnt þakklæti eða óánægju

Ritun:

• geti nemandi skrifað sendibréf, tölvupóst, skilaboð
• geti nemandi sagt frá og tjáð skoðanir sínar á skiljanlegu, rituðu máli og nýtt sér helstu atriði málfræðinnar í málnotkuninni

Aðferðir til að ná þessum markmiðum eru lestur frjálslestrarbóka, málfræðivinna, samtalsæfingar, áhorf myndbanda og ýmiskonar hlustun, samræður um daglegt líf í Danmörku, tölvunotkun, bæði kennsluforrit og bréfasendingar.

Áfangamarkmið

• Skólinn mæti mismunandi þroska og þörfum nemanda með kennslu við hæfi hvers og eins

Sjá aðalnámskrá grunnskóla fyrir erlend tungumál

Námsefni:

Tænk og Ekko, lesbækur, vinnubækur og hlustunarefni.  Ýmsir námsvefir s.s. Skólavefurinn, nams.is, Danske diamanter og fl. Ennfremur horft á danskar kvikmyndir og unnin verkefni í tengslum við þær.

Námsmat:

Áhugi og virkni í tímum, skil á heimaverkefnum, skyndipróf, miðsvetrar-og vorpróf. Sjálfsmat.

Saga 

Kennari:

Jónas E. Ólafsson

Markmið:

m.a. að nemandinn:

• skoði byrjun aldarinnar sem skeið þar sem ýmsir möguleikar voru hugsanlega fyrir hendi
• kynni sér gang seinni heimstyrjaldar með því að velja sér sjónarhorn og efni þekki atburðarrás stríðsáranna í stórum dráttum
• kanni sögu tækninýjunga síðustu hundrað ár sem hafa opnað nýjar leiðir til tjáningar og boðskipta
• leiti svara við spurningunni um hvort unglingar hafi orðið afmarkaður þjóðfélagshópur eftir stríð
• sjái hvernig ýmis veigamikil málefni hafi verið bundin stjórnmálaflokkum en önnur ekki.

Sjá aðalnámskrá grunnskóla fyrir samfélagsgreinar

Námsefni:

Úr sveit í borg, Samfélagsfræðivefurinn, Skólavefurinn o.fl.

Námsmat:

Vinnsla verkefna, frammistaða í tímum og próf.

Náttúrufræði

Kennari:

Þóranna Lilja Snorradóttir

Markmið:

Sjá aðalnámskrá fyrir náttúrufræði á síðu Menntamálaráðuneytisins.

Á unglingastigi eiga nemendur að öðlast færni og sjálfsöryggi við að leysa fjölbreytt verkefni með eða án ítarlegra leiðbeininga og geta fjallað um sameiginlega þætti í ólíkum námsgreinum, s.s. landafræði, sögu, félagsfræði og náttúrufræði. Mikilvægt er að nemendur öðlist vilja til að leita eftir og deila upplýsingum og skýringum með öðrum. Þannig átta þeir sig frekar á að útskýringar eru aldrei endanlegar og ekki er hægt að sanna þær svo að óyggjandi sé. Þeir þurfa að gera sér grein fyrir hlutverki líkinga í vísindalegum skýringum, geta útskýrt með dæmum hvernig þekking á náttúrunni hefur þróast og geta fjallað um gagnkvæm áhrif tækni og vísindalegra framfara, t.d. með tilkomu smásjárinnar og sjónaukans, eða uppgötvun röntgengeisla og hagnýtingu þeirra.

Námsefni:

Unnið verður með bókina Lífheimurinn fyrir áramót og svo verður farið í bækurnar Erfðir og þróun og Efnafræði eftir áramót.

Námsmat:

Verkefni, upprifjanir og kaflapróf ásamt sjálfsmati.

Námstækni og lífsleikni 8.-10. bekkur

Markmið: Að kynna fyrir nemendum árangursríkar aðferðir í námi. Stuðla að því að nemendur meti og endurskoði námsvenjur sínar og aðrar lífsvenjur sem geta haft áhrif á nám.

Einnig að aðstoða nemendur við að setja sér raunhæf markmið í námi sínu og stuðla að auknu sjálfstrausti nemenda.

Fjallað verður um eftirfarandi þætti:

• Að skipuleggja tíma sinn
• Lífsvenjur sem geta haft áhrif á árangur í námi
• Minni, gleymsku og einbeitingu
• Árangursríkar lestraraðferðir
• Glósur
• Að skrifa ritgerð
• Prófundirbúning og próftöku
• Að vinna gegn prófkvíða
• Jákvætt hugarfar og líðan
• Að setja sér raunhæf markmið
• Sjálfstæð vinnubrögð og ábyrgð á eigin námi

Einnig verður farið í jafnréttisfræðslu því mikilvægt er að nemendur séu færir um að hafa mannréttindi og jafnrétti að leiðarljósi í samskiptum. Nemendur verða þjálfaðir í að færa rök fyrir máli sínu í því skyni að geta tjáð og rökrætt hugsanir sínar, skoðanir, tilfinningar og væntinar.

Linkur á lífsleikni

Námsefni:

Námstækni fyrir efstu bekki grunnskóla

Náðu tökum á náminu!

Jafnréttishandbókin og efni af netinu tengt jafnrétti.

Klárari en þú heldur og ýmislegt ítarefni frá kennara tengt sjálfstrausti og uppbyggingu.

Námsmat: Verkefnavinna (einkunnir og skil) gilda 50%, þátttaka og virkni í tímum 50%.

Bekkjarfundir

Kennari

Sólrún Friðriksdóttir

Bekkjarfundir eru stundaskrá, 60 mín. einu sinni í viku.

Meginmarkmið bekkjarfunda er að skapa öruggara andrúmsloft meðal nemenda þar sem traust og samvinna ríkir meðal þeirra sem taka þátt í fundinum.

Á bekkjarfundum gilda ákveðnar reglur sem nauðsynlegt er að fylgja á hverjum fundi og eru þær helstar:

• · Við réttum upp hönd þegar við viljum fá orðið
• · Allir mega taka til máls.
• · Við leyfum fólki að ljúka máli sínu án þess að grípa fram í.
• · Við getum verið ósammála án þess að bölva eða vera orðljót
• · Við hlustum hvert á annað
  · Við gerum ekki lítið úr skoðunum annarra né þeim sem hafa skoðanirnar.
• · Allir hafa rétt til þess að hafa eigin skoðanir og halda sig við þær
• · Muna eftir þagnarskyldunni

Í lok hvers fundar meta nemendur sjálfir hvernig til hefur tekist með fundinn.

Listasmiðja (Val)
Myndmennt og Hönnun og smíði

Kennarar:

Þóranna Lilja Snorradóttir og Sólrún Friðriksdóttir

Markmið:

Sjá aðalnámskrá grunnskóla fyrir hönnum og smíði á vef menntamálaráðuneytis

Sjá nánar aðalnámskrá grunnskóla fyrir listgreinar

Í vetur verður sú nýbreytni að Hönnun og smíði og Myndmennt verða kennd í vali sem listasmiðja. Þetta eru þrjú skipti hjá hvorum kennara, 5 vikur hver lota.

Í hönnun og smíði fær nemandinn þjálfun í að móta hugmynd í efni með þeirri verktækni og verkþekkingu sem greinin býr yfir. Þetta verklag hvílir á sígildri kunnáttu sem mikilvægt er að hver ný kynslóð nái að tileinka sér. Smíði felur í sér nýtingu efnisheimsins sem hefur aftur mótandi áhrif á umhverfi. Með smíðinni er verið að laga umhverfið að þörfum okkar.

Í vetur verða unnin þrjú verkefni í Hönnun og smíði.

Góðmálmasmíði

• Nemendur kynnast mismunandi málmum
• Nemendur hanna tvo hluti
• Vinna úr silfri

Stóll

• Nemendur skoða mismunandi gerðir af stólum
• Gera sinn eigin stól

Listaverk

• Nemendur vinna verkefni úr steypu og steypustyrktarjárni
• Sett upp fyrir sumarið á lóð skólans.

Námsmat. Nemendur metnir eftir hvert verkefni

Myndmennt

Sjónræn upplifun er stór þáttur skynjunar og skilnings mannsins á heiminum enda bendir flest til þess að hann hafi allt frá upphafi vega myndgert líf sitt og umhverfi í margvíslegum tilgangi. Myndir hafa sitt eigið tungumál, myndmál, og maðurinn hefur alla tíð notað myndir sem boðtæki þeirra hluta sem ekki er hægt að lýsa á annan hátt. Myndmál miðlar viðhorfum, skoðunum og hugmyndum samfélagsins ekki síður en tungumál.

Teikning:

• Línan og skygging
• Andlit, hlutföll

Mótun – skúlptúr

• Pappírsgerð, endurvinnsla pappírs
• þrívíð mótun úr pappamassa

Ljósmyndun og málun

• Ljósmyndað í náttúrunni
• Unnið með ljósmyndir í tölvu og í málun
• Málað með acryllitum / vatnslitum

Sjá nánar aðalnámskrá grunnskóla fyrir listgreinar

Námsmat:

Öll unnin verkefni metin jafnóðum og metnir þættir s.s. frumleiki, vinnubrögð, framfarir, frumkvæði og viðhorf til námsins. Einnig sjálfsmat. Nemendur fá bæði umsagnir og einkunnir.

Heimilisfræði

Kennari

Jóhanna Margrét Agnarsdóttir

Markmið

Lögð er áhersla á að veita þekkingu og leikni í heimilisstörfum og auðvelda skipulagningu, samvinnu og hagsýni. Meðal viðfangsefna má nefna næringarfræði, matvælafræði, neytendafræði, hreinlætisfræði, vinnuskipulag, matreiðslu og bakstur.

Sjá aðalnámskrá grunnskóla fyrir heimilisfræði

Námsefni

heimilisfræði ll (Námsgagnastofnun), verkefnablöð og fjölritað efni frá kennara.

Námsmat

Símat í kennslustundum.
 

Kennari:

Jóna Petra Magnúsdóttir

Markmið:

Sjá aðalnámskrá fyrir íþróttir, líkams- og heilsurækt

Nemendur á grunnskólaaldri eru á aldursskeiði sem einkennist af miklum vexti og örum þroska. Framvinda eðlilegs þroska, hvort heldur um er að ræða skyn- og hreyfiþroska, líkams- og fagurþroska eða félags-, tilfinninga og siðgæðisþroska, er að miklu leyti háð hæfilegri áreynslu og samspili markvissra æfinga og leikja. Með kerfisbundinni þjálfun eða útfærslu leikja er hægt að auka starfsemi líkamans og sinna mismunandi þroskaþáttum. Á því aldursskeiði, sem grunnskólinn nær yfir, er t.d. unnt, betur en síðar á ævinni, að auka hæfni hjarta og blóðrásar með markvissri þjálfun. Hið sama á við um atriði sem ná til skyn- og hreyfiþroska. Því er það eitt meginmarkmið skólaíþrótta að örva skyn- og hreyfiþroska hvers nemanda, þrek hans og afkastagetu og stuðla þannig að heilbrigði einstaklingsins.

Námsmat:

Virkni í tímum, píptest og mánaðarleg þrekpróf.
 

Val: Myndmennt

Kennari:Sólrún Friðriksdóttir

Sjónræn upplifun er stór þáttur skynjunar og skilnings mannsins á heiminum enda bendir flest til þess að hann hafi allt frá upphafi vega myndgert líf sitt og umhverfi í margvíslegum tilgangi. Myndir hafa sitt eigið tungumál, myndmál, og maðurinn hefur alla tíð notað myndir sem boðtæki þeirra hluta sem ekki er hægt að lýsa á annan hátt. Myndmál miðlar viðhorfum, skoðunum og hugmyndum samfélagsins ekki síður en tungumál.

Á þessu stigi er áhersla lögð á sjálfstæða vinnu nemenda á grundvelli fyrra náms.

Við lok 10. bekkjar eiga nemendur að geta fylgt hugmynd til endanlegs verks. Þeir eiga að geta nýtt sér í eigin sköpun grunnþætti myndlistar s.s. útfærslu línunnar, lita-og formfræði, myndbyggingu, rými og áferð. Þeir eiga að kunna góð skil á ýmsum tegundum efna og áhalda til myndgerðar. Þeir eiga að geta nýtt sér nútímamiðla s.s. Netið, til að skoða listasöfn og afla sér upplýsinga um myndlist. Eiga að þekkja til helstu stefna og þekkja til fjölbreytni nútímalistar.

Sjá nánar aðalnámskrá grunnskóla fyrir listgreinar

Námsmat:

Öll unnin verkefni metin jafnóðum og metnir þættir s.s. frumleiki, vinnubrögð, framfarir, frumkvæði og viðhorf til námsins. Einnig sjálfsmat. Nemendur fá bæði umsagnir og einkunnir.
 

Val: Miðlun

Kennari

Björgvin Valur Guðmundsson

Farið verður í gerð stuttmynda, ljósmyndun og rafræna miðlun.

Námsefni er útbúið af kennara.  

Valgreinar

Bókfærsla 103 (FAS)

Fjallað er um grundvallaratriði bókhalds, dagbókarfærslur, opnun og lokun höfuðbókar og tengsl þessara bóka. Kenndur reikningsjöfnuður með einföldum athugasemdum. Helstu undirbækur kynntar. Kennt að merkja fylgiskjöl og færa dagbók eftir þeim. Nemendum gerð grein fyrir hlutverki bókarans og tilgangi bókhalds og sagt frá helstu bókhaldslögum til skilningsauka. Kynntar allar helstu bókhaldsbækur og mismunandi aðferðir við færslu bókhalds í fyrirtækjum. Mikil áhersla lögð á vönduð vinnubrögð nemenda og góðan frágang. Tónlist

Grunnskólinn á Stöðvarfirði og Tónlistarskóli Fáskrúðs- og Stöðvarfjarðar hafa með sér samstarf um að bjóða nemendum í unglingastigi upp á tónlistarval. Námið sjálft er alfarið á vegum Tónlistarskólans og er kennt samkvæmt aðalnámskrá tónlistarskóla. Mætingarskylda er í námið og þurfa nemendur að greiða skólagjöld samkvæmt gjaldskrá Fjarðabyggðar.

Heimilisfræði

Markmið

• að nemendur þjálfist í að beita fjölbreyttum matreiðsluaðferðum eftir uppskriftum
• að nemendur öðlist færni í að þvo upp í höndum og halda hreinum tækjum og áhöldum í umhverfi sínu og tileinki sér hreinlæti í verki við heimilisstörf.
• að nemendur sýni samábyrgð og hæfni til að vinna með öðrum.
• að nemendur kunni skil á þeim áhöldum sem nota þarf við matreiðslustörf.

Nám og kennsla

Notuð er bókin Matur og menning ásamt ýmsum uppskriftum sem fást bæði í matreiðslubókum og eins á netinu. Í heimilisfræðinni er fengist við bæði bóklega og verklega kennslu. Það er reynt eins og kostur er að samþætta verklega og bóklega þætti námsins. Námsmat

Verkleg þjálfun er stór hluti heimilisfræðinnar og er því símat nauðsynlegt. Það er framkvæmt með því að nota matsblað sem tekur á því hvernig nemandi vinnur í tímum, hvernig hann kemur fram við þá sem hann vinnur með, hvernig hann gengur um og hvort hann sýni tillitssemi og kurteisi í tímum.

Stuttmyndagerð

Skrifað verður handrit og búin til lýsing á myndinni, „storyboard,“ og hugað að tökustöðum, sviðsmyndum, birtu og lýsingu, aðferðum við tökur og fleira. Myndin síðan tekin upp og hún klippt og hljóðsett.

LEGO

Tæknilegosett skólans verður notað og nemendur hanna þrautabraut og lausnir fyrir hana. Farið verður í forritun og hönnun og smíði vélmenna og annarra hreyfanlegra hluta úr Lego. Ef unnt reynist, verður hópurinn skráður til þátttöku í First LEGO League keppninni.

Textíll

• að efla hugmyndaflug, sköpunarhæfileika og sjálfstæði nemenda.
• að nemendur tileinki sér undirstöðuatriði þeirra verkþátta sem farið er í.
• að stuðla að auknum skilningi nemenda á gildi handverks.
• að efla vandvirkni og samviskusemi nemenda við vinnu.

Nám

2 skylduverkefni og 2 valverkefni unnin í samráði við textílkennara.

1. Skylduverkefni: Nemendur læra að taka mál af sér og búa til grunnsnið af pilsi og vinna nánar með það á önninni. Nemendur læra meðal annars að breyta grunnsniði og gera ýmsar útfærslur á sniðinu. Nemendur læra að setja í rennilás og að falda flíkina.

2. Valverkefni í samráði við textílkennara. Nemendur þurfa að gera grein fyrir í verkefnabók hvaða áhöld þeir notuðu, hvaða efni og hvaða aðferð var beitt. 3. Skylduverkefni: Fatasaumur

4. Valverkefni í samráði við textílkennara. Nemendur þurfa að gera grein fyrir í verkefnabók hvaða áhöld þeir notuðu, hvaða efni og hvaða aðferð var beitt.

Heilsurækt

Útivist. Fyrstu tveir mánuðirnir verða helgaðir útivist. Fyrirhugaðar eru tvær fjallgöngur, þar sem önnur fjallgangan verður mjög krefjandi, gist verður í tjöldum og þurfa nemendur að hafa tilheyrandi búnað meðferðis.
Undir útivist er einnig hjólreiðar en með þeim er verið að hugsa um styttri vegalengdir. Ratleikur þar sem nemendum verður kennt að útbúa ratleiki fyrir hvern annan.
Kajakar, en áhugi er að fá dags kynningu á þeim.
Sund/sundleikfimi og heitipotturinn.
Þreksalurinn farið verður í þreksalinn eftir áramót þar sem nemendur fá að svitna ærlega  Valið í Skólahreysti keppnina fljótlega eftir áramót.
Glíma, fyrirhugað er að fá kynningu á þessari alíslensku keppnisgrein.
Skíði/skautar, farið í grunnatriði skíðaíþróttarinnar.
Farið í grunninn á næringarfræðinni.
Markmið: Að efla áhuga nemenda á útiveru, hreyfingu og mikilvægi réttrar næringar.

 

Íþróttafræði 102

Áfangamarkmið Nemandi:

• læri um hlutverk þjálfara í íþróttum
• þjálfist í skipulagi þjálfunar og markmiðssetningu
• læri að skipuleggja einstakar æfingastundir
• læri muninn á þjálfun barna og fullorðinna
• þekki helstu þjálfunaraðferðir
• geti nýtt sér upplýsingatækni við skipulag þjálfunar